పాక్‌ ఉప ప్రధాని ముందే ఉగ్రవాదంపై రాజ్‌నాథ్‌ ఘాటు వ్యాఖ్యలు

ఉగ్రవాదంపై భారత్‌ మరోసారి గట్టి సందేశం ఇచ్చింది. ఉగ్రవాదులకు నిధులు సమకూర్చేవారు, మద్దతు ఇచ్చేవారు, ఆశ్రయం కల్పించేవారికి ఎక్కడా చోటు ఉండకూడదని రక్షణ మంత్రి రాజ్‌నాథ్‌ సింగ్‌ స్పష్టం చేశారు. ఉగ్రవాదాన్ని ఎదుర్కొనే విషయంలో ద్వంద్వ ప్రమాణాలకు తావులేదని అన్నారు. తజికిస్థాన్‌ రాజధాని దుషాంబేలో మంగళవారం జరిగిన షాంఘై సహకార సంస్థ (ఎస్‌సీఓ) సమావేశంలో ఆయన ఈ వ్యాఖ్యలు చేశారు. పాకిస్థాన్‌ ఉప ప్రధాని ఇషాక్‌ దార్‌ కూడా ఈ సమావేశంలో పాల్గొనగా, ఆయన ముందే రాజ్‌నాథ్‌ ఈ వ్యాఖ్యలు చేయడం గమనార్హం.

ఉగ్రవాదం అమాయకుల ప్రాణాలను బలిగొనడమే కాకుండా పెట్టుబడులు, వాణిజ్యాన్ని దెబ్బతీస్తుందని రాజ్‌నాథ్‌ అన్నారు. సమాజంలో తీవ్రవాద భావజాలాన్ని పెంచి, యువతకు దక్కాల్సిన అవకాశాలను దూరం చేస్తుందని పేర్కొన్నారు. ఉగ్రవాదాన్ని ఎట్టి పరిస్థితుల్లోనూ సమర్థించలేమని స్పష్టం చేశారు. ఉగ్రవాదానికి మద్దతు ఇచ్చే మొత్తం వ్యవస్థను అంతర్జాతీయ సమాజం సమష్టిగా, దృఢంగా నిర్మూలించాలని పిలుపునిచ్చారు.

పాకిస్థాన్‌ నుంచి ఉద్భవించే ఉగ్రవాదంపై భారత్‌ వైఖరిలో మార్పు లేదని రాజ్‌నాథ్‌ గతంలోనూ స్పష్టం చేశారు. అక్టోబర్‌ 15న ఆయన మాట్లాడుతూ.. పాకిస్థాన్‌ నుంచి మరోసారి ఉగ్రదాడులు జరిగితే గతంలో కంటే బలమైన ప్రతిస్పందన ఉంటుందని హెచ్చరించారు.

న్యూఢిల్లీలో జరిగిన టైమ్స్‌ నెట్‌వర్క్‌ డిఫెన్స్‌ కాన్‌క్లేవ్‌లోనూ ఆయన ఉగ్రవాదంపై మాట్లాడారు. చర్చలు, సహజీవనం, వివాదాలను శాంతియుతంగా పరిష్కరించుకోవడం పట్ల భారత్‌కు ఉన్న నిబద్ధతను బలహీనతగా భావించరాదని అన్నారు. ఆపరేషన్‌ సిందూర్‌, బాలాకోట్‌ వైమానిక దాడులు, సర్జికల్‌ స్ట్రైక్స్‌ కేవలం సైనిక చర్యలు మాత్రమే కాదని, ఉగ్రవాదాన్ని దాని మూలాల వద్దే ఎదుర్కొనే దిశగా భారత్‌ వైఖరిలో వచ్చిన మార్పునకు సంకేతాలని పేర్కొన్నారు.

2014 నుంచి భారత్‌పై ఆయుధాలు ఎక్కుపెట్టిన చాలా మంది ఉగ్రవాదుల ‘షెల్ఫ్‌ లైఫ్‌’ (ఆయుష్షు/కాలపరిమితి) ఏడాదిలోపే తగ్గిపోయిందని రాజ్‌నాథ్‌ అన్నారు. భద్రతా దళాలు వారిని సంవత్సరం తిరగకముందే మట్టుబెడుతున్నాయని పేర్కొన్నారు. శాంతియుత సహజీవనానికి భారత్‌ కట్టుబడి ఉన్నప్పటికీ, దేశ భద్రతకు ఎదురయ్యే సవాళ్లను ఎదుర్కొనేందుకు కూడా సదా సంసిద్ధంగా ఉందని తెలిపారు. దేశ సార్వభౌమత్వం, సమగ్రత, జాతీయ ప్రయోజనాలను కాపాడుకోవడమే తమ లక్ష్యమని స్పష్టం చేశారు.

ఎస్‌సీఓ సమావేశం సందర్భంగా రాజ్‌నాథ్‌ సింగ్‌ తజికిస్థాన్‌ ప్రధాని ఖోహిర్‌ రసూల్జోడా, ఇరాన్‌ ఉపాధ్యక్షుడు మొహమ్మద్‌ రెజా ఆరిఫ్‌తో విడివిడిగా భేటీ అయ్యారు. భారత్‌-తజికిస్థాన్‌ మధ్య దీర్ఘకాలంగా కొనసాగుతున్న నాగరికతా సంబంధాలు, ప్రజల మధ్య ఉన్న సన్నిహిత అనుబంధాలను రసూల్జోడాతో సమావేశంలో ప్రస్తావించారు. ప్రాంతీయ సహకారంపై చర్చించేందుకు ఎస్‌సీఓ సభ్య దేశాల ప్రతినిధులు దుషాంబేలో సమావేశమయ్యారు.